భీమవరం

భీమవరం పట్టణం ఆంధ్ర ప్రదేశ్ రాష్ట్రములోని ముఖ్య పట్టణాలలో ఒకటి. ఇది పశ్చిమ గోదావరి జిల్లాలో ఏలూరు పిదప అతి పెద్ద పట్టణం. ఏలూరు పట్టణాభివృద్థి సంస్థలోని ఒక ఊరు. పంచారామాల్లో ఒకటైన సోమారామం భీమవరంలోనే ఉంది. ఈ పట్టణ పరిసరాలు రొయ్యల/చేపల చెరువులతో వర్ధిల్లుతున్నాయి; ఆ వ్యాపారమే ఈ పట్టణ ముఖ్య ఆదాయ వనరు. అది గాక రైస్ మిల్లులు, వరి/వ్యవసాయ-సంబంధిత కర్మాగారాలు కూడా ఇచట పెక్కు. చుట్టుప్రక్కలనున్న దగ్గర దగ్గర 150 గ్రామాలకు ఇది వాణిజ్య రాజధానిగా వర్ధిల్లుతుంది. ఆసుపత్రులు, విద్యా సంస్థలు, సినిమా హాళ్లు, వస్త్ర దుకాణాలు, బంగారం కొట్లు, గుళ్లు-గోపురాలు, ఉద్యానవనాలు, భోజన హోటళ్లు మొదలయిన ఎన్నో సదుపాయాలు ఈ పట్టణాన్ని నివాసయోగ్యం గానూ ఆహ్లాదకరంగా గానూ మార్చాయి.